ސިފައިންނާ ފުލުހުންނަށް ޙާއްސަ ކޮށްގެން ހެދި ފްލެޓްތައް ހަވާލު ކުރިކަމަށް ބުނެ ސަރުކާރުން ހެދީ ދޮގު ކަމަށް ބައެއް ފަރާތްތަކުން ތުހުމަތު ކުރަން ފަށައިފިއެވެ.
ނަން ނުޖެހުމަށް ޝަރުތު ކޮށް މައުލޫމާތު ދިން ފަރާތަކުން ހާމަ ކުރެއްވި ގޮތުގައި އެފަރާތުން ފްލެޓްތައް ލިބޭނެ ކަމަށް ޖުލައި މަހުން ފެށިގެން އިންތިޒާރު ކުރިއެވެ. އަދި ފްލެޓްތައް އެއް ކޮށް ނުނިމެނީސް ސަރުކާރުން ވަނީ ނިމުނު ކަމަށް ހަދާ ފޮޓޯ ސެޝަން އެއް ބާއްވާ ތަޅުދަނޑި ހަވާލު ކުރުމުގެ ހަފްލާ އެއްވެސް ބާއްވާފައެވެ.
މިކަމުގެ ސަބަބުން ބައެއް ފަރާތްތަކުން ވަނީ މާލޭގައި ކިޔަވާ އެމީހުންގެ ސްކޫލް ކުދިން ހުޅުމާލެއަށް ބަދަލު ކޮށް އަދި މާލޭގައި ކުއްޔަށް ތިބޭ އިމާރާތްތަކުގެ ވެރިންނަށް ދޭންޖެހޭތީ އެކަމުގެ ނޯޓިސް ވެސް ފޮނުވާފައެވެ.
އިމާރާތް އެއްކޮށް ނުނިމެނީސް ފޮޓޯ ސެޝަން އެއްގެ ބޭނުމުގައި މިފަދަ އޮޅުވާލުމެއް ހެދުމުގެ ސަބަބުން އެފަރާތްތަކުން މިހާރު ވަނީ މާޔޫސް ވެފައެވެ. އެއީ ނޯޓިސް ދިން އެމީހުން ކުއްޔަށް އުޅޭ ތަންތަނުން ނުކުންނަން ޖެހިދާނެތީއެވެ. އަދި ސްކޫލް ކުދިންގެ ކިޔެވުމަށް ބުރު އަރާ މިފަދަ ކަންތައް ހިނގާފާނެތީއެވެ.